هبّات شهر اكتوبر 🗓🤓💕

 صباحكم خير وحب وسعاده وهناء وراحة بال وجمعة مباركه على الجميع 💖، كيفكم؟ 

تدوينة اليوم قررت اني اتكلم فيها عن هالاسبوعين وفترة النقاهة من ظغوطات الدراسه وجلسة البيت وتغييرات اللي بديت اضيفها واجربها واستفدت منها فآنشاء الله التدوينه بتكون خفيفه لطيفه كلها ايجابيه 💜، في معلومه سمعتها من هبه المسلم الله يذكرها بالخير وكآن هالمعلومه جات بوقتها عشان تعطي اجابات ، وبناءً عليها بديت اطبق 

عشان تعيش حياتك صح ! اهتم بثلاث اشياء وغذيّها .. غذّي عقلك روحك وجسمك 👌🏻💕

غذي عقلك بقراءة اشياء تفيدك تمتعك وتحسن من نفسيتك جالس ناس طاقتهم حلوه و خل تركيزك واذنك وتفكيرك معهم وقت الحديث ، لآن الايجابيه معديه . انك تذَكرين نفسك بآنك تحبين نفسك وانك تثقين بنفسك ، تكررها يعطيك انطباع خارجي ويعزز الثقه عندك من الداخل وهالشي ماتحس فيه الا اذا مارسته . 👍

غذّي روحك بكثرة العبادة والتقرب لله والاستغفار وكثرة الدعاء مع الايمان التام بلآستجابه ، لآن الله ماخلق عباده ونساهم 🌟

غذي جسمك بآهتمامك بنظافتك ببشرتك بشعرك بآكلك واللي يدخل لجسمك سواء كان من اكل صحي او ادويه ومكملات غذائيه ، ممارستك للرياضه وغيرها الكثير 💪

هاثلاث الاشياء اذا غذيتيها رح تعطي تآثير حلو بنفسيتك وتحسن من مزاجك وتصيرين اكثر انتاجيه ، وبناءً على هالمعلومه قررت اني ابدا شهر اكتوبر بتطبيق لقواعد الثلاث ... 

 هالسنه حرفياً بديت اقرء كتب ودخلت عالم القراءه من اوسع ابوابه 📖 ، وبديت احمل تطبيقات عشان اعرف اخر الروايات وتقيماتها و اقرآ ريفوهات عنها ، وبديت بعد كل كتاب اضيفه لقائمة التحدي هالسنه اكتب رآيي وتقيمي له في تطبيق قوود ريد، هالتطبيق يجمع القراء والكُتّاب في تطبيق واحد ويعطي سهوله للقارء انه يتواصل مع الكاتب ويعرف جديد اصداراته والكتب اللي يوصّي بها ، كتبت تدوينه مفصله عن هالتطبيق باللغه الانجليزيه قبل كم شهر لو حابين طلو عليه 👇 فيه التفاصيل اللي تحتاجوها عشان تفتحو اكاونت وتبدئو تحدي القراءه الخاص فيكم 

رابط التدوينه : 

Goodreads application 

من الكتب اللي بديت اقرآها هالشهر هي كتاب بنات حواء الثلاث ، من الكاتبه إليف شافاك ، وهي نفسها اللي كتبت كتاب قواعد العشق الآربعون ، هالكاتبه ملهمه و احبها كثير واندهشت من سيرتها ومن الانجازاتها الذاتيه اللي حققتها ، لو حبين تقدرو تبحثو عنها او تلقو نبذه وتعريف عنها في بداية كتاب بنات حواء الثلاث بقلم محمد درويش . 💙

ومن الاشياء برضو اللي صرت اتابعها غير نتفليكس طبعاً ... بديت اتابع برنامج اريكة لبيبي وطلال سام وقت الفطور وبعد صلاة الفجر، جلستهم ونيسه ويعرضون اشياء غريبه ومعلومات متعه كآنك جالس معهم ماكآنهم ببرنامج، غير عن البرامج اللي نلقاها عادة في اليوتيوب ، مع اني انسانه نادرا اتابع برامج او اشخاص باليوتيوب لكن كان برنامجهم تغير جو صراحةً ، ولو تمنيت لو كانت حلقاتهم اقصر بشوي ولكن هالشي ما يمنع انهم خفيفين على القلب الصراحه  💕

ومن الاشياء اللي انبسطت اني اتقنتها وبديت اتفنن فيها واستمتع وهالشي مو هالشهر بديت اتقنها صارلي يمكن شهرين 🤓✌️ ، الطبخ ، قبل كنت ما احب اكل طبخي وبزّور اسويلي وجبه باليوم واحيانا انسى اكل ،ما كنت اشتهي طبخي .. بس اللحين ! حرفيا قمت قليل ما اطلب مطاعم وهالشي مبسوطه منه 💖، صرت اطبخ واتلذذ بطبخي وانفتحت شهيتي للآكل بعد سنه مُعانه مع الآكل ، قمت ازبط اشياء ماكنت ازبطها مثل تتبيله والعجين وغيرها ، قمت احس ان طبخ البيت اطعم وانكه واجد اكثر من اكل مطاعم ، بس السر في تتبيله وطريقة الطبخ او النضج ، فقط .. فهالشي قلت لازم اضيفه لآني مرره مبسوطه منه 

بديت اسويلي جدول للعناية بشعري ، انا صارلي من ثاني متوسط وانا احط على شعري حنا وزيوت اورقانيك ، ومازلت مستمره عليها الى الان من ٦ سنين ، الحمدالله ما اعاني من تلف بآطراف شعري ولا اعاني من نفشه او قشره او مشاكل في شعرولله الحمد والمنه ، صحي وناعم وكله من المواضبه على الحنا ، حرفيا من بديت احني شعري وهو كله صحه ونعومه ومريحني ومرتاحه عليه لله الحمد ، حرفيا الحنا سحر ، انا ما استخدم الحنا كصبغه بالعكس استخدم الحنا ك تغذيه لشعري . فهالاسبوع كنوع من التغير حبيت اسوي جدول للعنايه بشعري واستمر عليه اقل شي ثلاث شهور عشان اشوف الفرق بكثافة الشعر وقوته وطوله ، قررت ان يكون الجدول الا وهو كا لآتي :

الآحد حنا ـ الاثنين زيت + اشرب عصير الشمندر وبرتقال ـ الخميس موية الآرز واشرب عصير شمندر وبرتقال 

اللي اضفته على جدولي هو موية الآرز ، كثير سمعت ان موية الارز فوائدها لا تعد ولا تحصى للشعر والبشره منها انه يقوي الشعر ويعطي مفعول ونتيجة البروتين مع الاستخدام المستمر ، و المعروف عنه انه يطول الشعر فقررت اني استخدمه لشعري مرة في الاسبوع واشوف نتيجته بعد ثلاثة اشهر ، ومعلومه سريعه للي بيستخدم موية الرز استخدموها مره في الاسبوع وخلوها على شعركم ساعتين فقط ، كثرة استخدام موية الرز زياده عن مرتين في الاسبوع بتسبب تكسر الشعر بما ان الفوائد المويه انه تغلف الشعر ببروتينات وتقوياها فآنتبهو للي بيبدا بموية الرز .

برضو حطيت بالجدول عصير الشمندر احب اشربه مع برتقال فرش اعصره بنفسي ، تقدرو تشربوه مع اي فاكهه عشان يغير من الطعم شمدر ، فوائد الشمندر خلتني اتحمس اني ابدا اشربها ولكن ليس بكثره ، فائدة لشعري لصحتي ولبشرتي مارح اكتب فوائده لاني لو ببدا فيها مارح اخلص . اقرو عنها بقوقل افضل 

وهذا ثاني اسبوع التزم بالجدول وجداً مرتاحه عليه وسهل وانشاء الله اشوف نتائج عصير الشمندر وموية الرز في الآيام القريبه انشاء الله 

من الاشياء اللي ادمنتها هالشهر اهيا لعبة amoung us 

اللي يعرفني يعرف اني انسانه ما احب الآلعاب ابداً ، ومو من الناس اللي تهب باللعبه ، ببجي وفورت نايت عجزت افهمها وعجزت اندمج فيها ما آدري مو جوي ومو متعوده العب هالنوع من الآلعاب ، بس هاللعبه بالذات ادمان ، سهله وتونس وتقهر وتطلع من المود ، خاصة اذا كنت مخلصه امتحان او بعد زحمة واجبات اطلع من هالمود بكاسة قهوة ولعبه وفعلياً تغير المود من  الآلف الي الياء .

وبكذا اكون وصلت لنهاية التدوينه انشاءالله تكونو استفدتو ولو بشي بسيط واشوفكم في مواضيع قادمه .🌟💖💖💖💖