مسائكم خير وحب وسعاده وايجابيه وكل شي حلو بالحياه :) كيفكم ؟
تدوينة اليوم مصورتها من قبل وحافظتها بالبلوق لكن مابديت اكتبها غير اللحين تعرفون فترة الامتحانات وكذا ، الشي الحلو اني اجزت قبل راس السنه لان فيه تدوينات بخاطري انزلها قبل لا تنتهي السنه وقاعده اشتغل عليها عشان يمدي اخلصها باليومين هاذي ، المهم ، الشهر اللي فات مع خصومات الفضيعه اللي كانت بموقع باث اند بودي قررت اني اسوي بغرفتي ركن كامل متكامل خاص بباث اند ابودي وركس ، قشيت قش محترم ، مارح تتوقعون السعر اللي اخذت فيه هالكمية الاشياء اللي اشتريتها المهم الكريمات ما اقدر كتبلكم اسعار كل وحده فيها لاني اخذتها بعرض بس بكتبلكم العرض اللي اخذته تحت كل واحد فيها ، كل قطع اللي اشتريتها من باث اند بودي تلقوها بالموقع حقهم ، كنت رح احط روابطها تحت كل قطعه لكن للآسف في منها مخلص ، اما بودي شوب اخذته من الفرع حقهم . وعشان ما اطول عليكم يله نبدآ
اول كريم رح ابدآ فيه هو كريم marshmallow pumpkin latte
هالكريم مو حلو وبس ، خيالي ، شقد تحسفت اني ما قشيت منه اثنين ثلاثه واني ما اشتريت الكوليكشن كامل لان كلمة رائع قليله عليه ، كنت متوقعه انو ريحته مارح تعجبني ، بهالطلبيه اعتمدت على الروايح اللي انا جربتها وعارفتها من قبل وماشتريت شي غريب علي او جديد ، فكان هالكريم بالنسبه لي مجازفه لاني ما قد شميت من قبل ريحة يقطين او ريحة قهوه ، اخذته وانا حاطه في بالي انه احتمال مايعجبني ، حرفيا احلى كريم بالطلبيه كامله واكثر شي عجبني بينهم ريحته مو عارفه كيف اوصفها بس اقدر اقولها انها دافيه وهالشي اللي حببني فيها ، من مكونات العطريه لهالكريم لاتيه وقرع ومارشميلو محمص ومسك حلوى المكسرات ، ريحه لذيذه ، اخذته بالعرض اخذت كريمين بسعر ٧٠ ريال
اما هذا الكريم اسمه magic in the air
هالكريم اخذته لاني اوردي مجربته بالصيف اللي فات ووقعت بغرامه يعني هالكريم مو جديد علي ، ريحته احبها لانها مرتبطه بذكرى حلوه وايام حلوه عشان كذا رجعت اشتريه ، اختي لما شمته ما عجبها في ريحة زخه قويه شوي يمكن عشان كذا بس انا خلاص مبرمج مخي علي ان ريحته تجيبلي سعاده ، بالصيف اللي فات اخذت هالكريم مع الشاور جل حقه وما اقولكم عن الشاور جل الريحه الريحه تموت ، لو بس تجربون الشاور جل من هالمجموعه رح تدعون لي ، مكوناته زهرة اللوز ، سوسن ابيض ، فانيلا مخفوقه
وبرضو اخذتها بعرض الكريمين بقيمة كريم واحد
مجموعة vanilla bean noel
هالمجموعه كنت متحمسلتها من اول ما طلبت الطلبيه لانه مكوناته لذيذه فتوقعت الريحه بتكون مؤلفه لكن الريحه لو بقيمها ممكن اذا رتبت من واحد الى عشره رح يكون رقم احدعشر ، تعرفون ريحة الحلوى الكراميل اللي تجي قاسيه ودائريه نفس الريحه بالزبط ، ومافيه ريحه ثانيه غير ريحة الكراميل و تحمست الله يهديني اخذت كريم وشاور جل وعطر من نفس الكوليكشن ، مع ذلك التجربه حلوه مافي شي راح خساره اتس اوكي ، مكوناته حبوب فانيليا طازجه كارميل دافى، بسكويت سكر ، المفروض يسمون الكوليكشن كارميل بين نويل مو فانيليا لان مافيه ريحة فانيلا ، انا من عشاق روائح الفانيلا اي مجموعه فيها فانيلا بنسبه لي الفنانه سواء كان بكريم او بعطر ، المهم اخذت عطر الجسم ب الخصم ب٢٥ والكريمين من عرض كريمين بقيمة واحد والشاور جل اخذته ب١٩ ريال بس
كريم Japanese cherry blossom
هالكريم ما بقى احد م شفته عنده ، يمكن انا الوحيده اللي ما جربته ، اول ماطلبته ما كان في بالي شي معين او ريحه معينه بس توقعت فيه ريحه ، لانه فعليا مافيه ريحه يعني ريحة نيفيا ، الناس اللي تشيد بالهالكريم وبريحته ابغى اسآلكم كيف شميتو الريحه ؟ حرفيا هاذا ريحته نيفيا ، مكوناته براعم كرز الياباني ، كمثرى اسيوي ، بتلات ميموزا نضره ، ايش ميموزا ؟ معاليكم كلام فاضي نيفيا ، برضو اخذته من العرض يعني تقريبا اخذت اربع كريمات بقيمة اثنين يعني كآني اخذت اشنين مجانا :)
هاذا الكريم برضو من الكوليكشن الجديد اسمه winter candy apple
هالكريم ريحته سويت شي يجنن يجنن ، اخذته لوشن مو متذكره ايش كان الخصم عليه ناسيه لكن اخذته اقل من سعره ، ريحته سويت تفتح نفس وبارده تمنيت لو اخذت منه شاور جل لان ريحته عجيبه تستاهل ، من كوليكشن الخريف او الشتاء مو عارفه من اي كوليكشن ناس حيروني ناس يقولو شتا وناس يقولو خريف لكن هالكريم احلى ريحة بالكوليكشن بعد بمبكن لاتيه اكيد ، مكوناته تفاح احمر ، بتلات ورد شتوي ، وبرتقال مسكر .
بعد ماخلصت من الكريمات واللوشنات نبدآ بآحلى فقره اللي هي الشاور جل
هالشاور جل اسمه merry cherry cheer
انا انسانه مستحيل اطلب من باث اند بودي او اشتري منه بدون ما اخذ شاور جل ، اعشق شاور جلاتهم واحب اجرب كل شي وكل نوع من الشاور جلات ، المهم ، هاذا من الكوليكشن الجديد برضو ريحته زي حلوى الجلي ، شي لذيذ ولطيف ، وسعره مع الخصم مجنون سعره ب ١٩ ريال بس ، هالشاور جل مو حسافه مره ريحته عجيبه ماشريت من قبل هالنوع من الروائح وكانت تجربه رائعه هذا غير ان لونه يفتح النفس حلو ، مكوناته ، كريز مارشينو ، عصر رمان ، مسك مسكر
هالشاور جل اسمه Frosted coconut snowball
الناس اللي يحبون جوز الهند رح يعجبهم ، ريحة جوز الهند طاغيه عليه ، وقويه وهالشي احبه انا من النوع اللي احب الجوز الهند والفانيلا والمسك ب عطوري وتتشت ورد ما يمنع فهالشاور جل برضو عجبني بس اعرف ان اكثر الاذواق ماتعجبهم ريحة الجوز الهند ، اخذته بالخصم برضو بقيمة ١٩ ريال ، عاد وصف المكونات تحفه :) من مكوناته جوز هند متجمد ، فانيلا القطب الشمالي و عود مشمس
المعروف لايعرف thusand wishes
هاذي المجموعه كثير اسمع عنها وكثير ناس يمدحونها وانا منهم مجربه الكريم من هالمجموعه واللحين اخذت الشاور جل ، طبعا انا صارت لي فاجعه بالطلبيه هاذي هو انو لما وصلني البوكس كانت الريحه فواحه انبسطت انا وجهي قلت بنفسي الله لو ريحه قبل لا افتحها فايحه اجل لو فتحتها ، ليتني ما فتحتها :( كان هالشور الجل منكب نصه بالبوكس ، ضاق صدري من المنظر ، بنات اختي قالو يمدي ترجعيه ويعطوك تعويض لانك تضررتي ومن هالكلام بس ستيل استخدمته ،ريحته مايحتاج اوصفها بنسبه لي من احلى الروائح عند باث اند بودي ، مكوناته بروسيكو قرنفلي وفوانا متلائله وكهرمان مذهب احب اقول ولا وحده منها فهمتها الصراحه لكن حلو اخذوه وانتو مغمضين ،وريحته بعد الشور تعبي الحمام حاجه جميله ، برضو اخذته مع الخصم ب١٩ ريال
واللحين بعد ما خلصت مشترياتي من باث اند بودي رح ابدا في بودي شوب وقبل ابدا رح اذكرلكم كم مجموع مشتريات قبل الخصم وبعده ، اخذت ١٢ منتج من باث اند بودي وركس ب٦٥٠ ريال شي زي كذا مع الخصم ومع الكود الخصم اخذت ١٢ منتج اللي انتو شايفينه اللحين ب٢٦٠ ريال بس ، يابلاشششش خصملي ٣٠٠ ريال وعليها
واللحين رح ابدآ بمشترياتي البسيطه من بودي شوب
اخذت من المجموعه الجديده اسمها juicy pear
اخذت الشاور جل و زبدة الجسم ، الريحه ما احكيلكم شي خيالي ، زبد الجسم من بودي شوب لي ولاء لها لاني من المتوسط من بداياتي في اهتمام و انا استخدم زبدهم ، فهالزبده توها نزلت قبل كم شهر شهرين شي زي كذا ريحتها كمثرى لكن مو اللي تحسون ريحة فواكه العاديه لا تحسوها عطريه اكثر ما اعرف كيف اوصلكم الريحه لكنها فنانه ، عندي ملاحظه وحده بس هو على شاور جل حق بودي شوب مافيه الثبات او ريحتها مو قويه يعني انا متعوده لما احط الشاور جل اخليه على جسم دقايق وبهالدقايق اسنفر وجهي افرش اسناني بعدها اشطف جسمي تكون الريحه شوي مسكت على جسمي ، روائح الشاور جل موشرط تبقى لليوم الثاني بس على الاقل تبقى ليله وتكون ريحتها ماسكه شوي خاصتا لما تتحركين او لما تشمين ملابسك تلاحظين ريحة لشاور جل مسكة على ملابسك وفايحه خاصة اذا استعملتي كريم والشاور جل من نفس الكوليكشن تكون ريحته اقوى وهالشي لاحظته بشور الجلات حقت باث اند بودي بس ما لاحظته ببودي شوب ، الزبده ريحتها خورافيه وثباتها حلو ترطيبها عجيب بس الشاور جل مارح ارجع اعتمد شاور جلات بودي شوب
المعروف لايعرف ايضا، كريمات اليد من بودي شوب سوو عرض على كريمات اليد من الكولكشنات القديمه بس العرض ما يشمل الكولكشن الجديد اللي نازل اشتري اثنين وخذي واحد مجانا ، هالكريمات نفعتني بالجامعه ترطيبها حلو وتوسع لشنطه وكميه اللي فيه تكفي ٤ شهور لو كنتي تستخدميه بشكل يومي بالدوام زيي ، واضحلكم كريم الزبده الشيا كيف استهلكته ؟:) المهم اخذت الفروله وجوز الهند وزبدة الشيا ، سعر مشترياتي من بودي شوب ٥ قطع منهم اخذتها بعد الخصم ب ١٨٠ ريال بس
وفي نهاية هالتدوينه اتمنى ما ارجع اوصف روائح لآن الموضوع متعب مو زي ماتوقعت ابدا ، انشاءالله تكونو استمتعتو زي ما انا استمتعت في كتابة هالتدوينه واستفدتو ولو بشي بسيط واشوفكم بمواضيع قادمه .
تعليقات
إرسال تعليق