بداية رحلة عناية بالذات self care - psychology✨💕

مساءكم سعاده ، كيف الحال ؟ 🤭💜

حالياً رتبت غرفتي ، واخذتلي شاور محترم ، وحطيت كريماتي عطوري وشغلت شمعتي ، فتحت اليوتيوب ببلازما ، وسويتلي قهوتي اللي احبها مع تشوكليت ، وجالست اكتب التدوينه .☕️

امس قريت تدوينه في مدونة هيا ، وكان عنونها رحلة عناية بذات self care, حبيت التدوينه ولو اني ما كملتها للأخير وماتعمقت فيها كثير، قد ماتعمقت بالعنوان (العناية بالذات) ✨ ، وقتها عرفت ان الاهتمام بالنفس ما يقتصر على جسمياً ، قد ماهو مهم الاهتمام بنفس نفسياً وروحياً وعقلياً 

هاذي الاشياء لا تقل اهميه عن الاهتمام بالجسم ، وانا بركز في هالتدوينه بلأهتمام نفسياً اكثر من اي شي ثاني ، الكلام اللي قاعده اكتبه ما ادري اذا كان علمياً او لا 🤔، اكتب اللي مقتنعه فيه واللي فادني و خلاني اتخطى مواقف وفترات بأقل الأضرار ، بحاول اذكر الاشياء الايجابيه اكثر من المواقف السلبيه اللي تعرضتلها لاني حابه تكون الطاقه بهالتدوينه حلوه قدر الأمكان 👏❤️، على الأقل بكتب الشي اللي احس فيه وابغا اطبقه على نفسي عشان نفسي وعشان القى راحتي 💕، يمكن تلقى شي يساعدك او يلهمك تبدئ معي بهالرحله ماتدري .🤷🏻‍♀️

فعشان هالشي تدوينة اليوم رح تكون رحلتي بالعنايه بالذات 💜

قررت ابدأ هالرحله من بعد ما بدت اوضاعي تستقر تدرجياً ، بعد ما مريت بفتره صعبه ، وقناعات بديت اكونها لنفسي عشان اعرف اعيش واتكيف واكون مرنه اكثر مع المواقف اللي تمر بحياتي ، دائماً حطي في بالك اذا مريت بمشكله ان المشاكل اللي تمر فيها والاوضاع السيئه اللي تمر فيها لابد بتلقى مخرج منها ، وان حالك ووضعك مارح يدوم ، دوام الحال من المحال ، زي ما ربي حطك باللي انت فيه اللحين ربي يقدر يخرجك منه ، زي ما انت اللحين بهالحال قادر ربي يبدل حالك ، ربي كبير مافيه شي صعب عليه ، المسأله مسألة وقت ، اعمل بالأسباب وخل الامور تاخذ مجراها ، توكل على ربي ، ربي هو اللي قادر يهونها عليك ، مهما شدت وصعبت ، ربك كبير❤️ 

وتذكر ان الأشياء اللي تمر فيها ، ماتمر عبث ، قاعد تمر لسبب ، يمكن السبب ما يكون واضح لك اللحين لكن ربي يبي يبينها لك بعدين ، يبيك تتعلم وتفهم وتكبر وتنضج ، لان الحياة تعلم ، لا تحسب نفسك تعيس ولا تطالع حياتك على انها سيئه ، طالع من هالزاويه ، صدقني رح تقويك 💪

من الأشياء اللي ممكن تساعدك نفسياً هو انك تتأمل ابسط الأشياء اللي حواليك ، تكسر القاعده المثل اللي يقول ( ماتعرف قيمة الشي الا اذا فقدته ) جرب تحس بقيمته تخيله مو موجود ، ايش بيكون شعورك وكيف بتكون حياتك بدونه 🧐، ناظر لشي عندك سواء كان احساس او شي ملموس ما يهم لأن كل عطايا ربي نعم اهم شي دقق ، وقتها بتحس ان ربي اخذ منك شي لكن عوضك بعشرين الف شي وانت مو ملاحظ ان ربي اخذ شخص عزيز عليك او شي معين فقدته ومتعود عليه لكن فتحلك فرص قدامك ماكانت مفتوحه لك ، مارح تحس بشي هذا الا اذا دققت ، بعيداً عن التدقيق بألاشياء اللي فاقدها وخسرتها جرب تدقق بلأشياء اللي امتلكتها بنفس الفتره ، رح تتحسن نفسيتك كثير 

او على الأقل تخفف من مشاعرك السلبيه  .👍

والله العظيم وما ابالغ حرفياً ، التفائل يعطي نتيجه جباره ✨، يعني ، لما تكونين من داخلك متفائله بربي خير وعارفه انك مارح تضيعين و تكونين واثقه انه ربي رح يحققلك مبتغاك ، صدقني اللي تبغاه بيصير ، ويكون ، ويتسهل 💕، ( انا عند ظن عبدي بي ) سبحان الله ، وعن تجربه ، امنت ان ربي بعد كل هذا رح يريحني ، لان فعلاً ، بكل مره اتفاءل بربي انه بيحل مشكلتي اللي عجزت في حلها او اي شي شاغل بالي سبحانك ربي كيف ينحل ، ظرف وقت وينحل ، عشان كذا اقول اللي امر فيه ما امر فيه عبث 👌🏻. وامر فيه لسبب وان ربي مخبيلي شي افضل واحسن بيوم ما ، الشعور هذا يطمني . 

هاذي اشياء اسويها عشان اعدل من نفسيتي وفعلاً تنجح معي ، النفسيه هي نصف العلاج اذا ماكانت العلاج نفسه ، فأذا ريحت نفسك وعدلت من نفسيتك رح يبان عليك على جسمك وبشرتك وصحتك ، كثير ناس انلاحظهم في عمر شباب لكن شكلهم معطي اكبر من عمرهم من التعب اللي يمرون فيه او من نفسيات يتعرضو لها لانه مايلاحظ لكن تبان عليه ، مارح اقول لا تخلي هالأمور تأثر عليك ، لأنك ادمي مو خشبه ، طبيعي تحس وتنزعج وتكتأب لا تحس ولا يحسسونك انه مو طبيعي ، لكن ابيك تعرف الفترة بتعدي صلح من نفسك عشان نفسك عشان تعرف تعيش . 

من الأشياء اللي بتعدل من نفسيتك انك تغير من المكان اللي انت فيه ، سواء كان ديكور او ترتيب اثاث غرفتك بطريقه غير ، انك تضيف اشياء ، تصب اهتمامك عليها ، برضو يعتبر انك تشغل نفسك بشي حلو وممتع وتنجز فيه ، وخاصة الترتيب والتنظيف وتأثيث هاذي كلها تحسن من النفسيه ، بنسبه لي اكثر شي يعدل نفسيتي اني البس واحط مكياج 🙊، يعطيني شعور يجنن احس نفسي فريش وجاهزه ليومي 💃، او اني انظف غرفتي واشغل شموع واخذ شاور ، زي مو مسويه اللحين ، تعدل من مزاجي ✨، فأنت القى شي اللي يحسن من مزاجك وسويه بنهاية يومك ، لا تنسى نفسك لنفسك عليك حق . 

التفكير احياناً يتعبني ، واحياناً يحسن مني كثير ، كيف يعني ؟ في الوقت اللي اكون فيه لنفسي لوحدي انا وبس ، افكر وياخذني الخيال ، اني رح اكون في يوم ما احسن ، وان الأيام اللي انا فيها رح تمر وما يبقى منها الا ذكرى سيئه احاول انساها ، و ان العوض بالجاي ، رح اوصل لمرحلة اللي اتمنى اوصلها بيوم ، اني أحب من قلب واعطي من قلب واكون متفهمه ، اكون اقل توتراً من اللحين ، اتخيل نفسي بمكان غير المكان ، مع  اشخاص غير  ،  الشعور اللي احس فيه وانا افكر بذي الطريقه مثل ابرة المهدئ ،  تعطيني دافع اني  اتحسن واحسن من نفسي لنفسي قبل اي احد و اصبر لأني راجيه من الله العوض بحياتي الجايه 💜 الدوافع ما تكفي دام الأيمان مو موجود ، أمني بهالشي وصدقي ان رب العالمين ما يخييب رجاك ابداً 

بالنسبه لي هاذي اقصر تدوينه كتبتها 👀 وترددت اذا انزلها او لا ، بس هاذا موضوع كثير مقصرين فيه وكثير ناس ابسط مشاكلهم يدخلون بكتأب ومايخرجون منه وما يعرفون ان الحل بأيدهم وان فيه مخرج من اللي هم فيه بس ما يشوفونه ، افكر انزل تدوينات للعنايه بالذات اكثر احس الموضوع متشعب وعندي كثير اتكلم عنها ، يعني التدوينه هاذي راضيه منها ٤٠ بالميه فقط احسها مره بسيطه وكتبتها بفترات متقطعه وحسيت اني تشتت شوي فيها لكن كتبت وحذفت كتبت وحذفت لحد ماستخلصت الموضوع وانشاءالله اكون ذكرت الاشياء المهمه ومانسيت شي ، 

على العموم هاذي التدوينه اعتبرها تصبيره للتدوينات اللي بتنزل لاني قاعده اشتغل على ٣ تدوينات وكلها ما خلصتها وصاير فيني اللي اكتب تدوينه واقعد اكتب فيها ثلاث اربع ايام وامطط ، فكتبت هاذي التدوينه في يوم واخذت صوره محفوظه من البوم الكميرا ونزلتها ، ما استحملت اخليها زياده عشان صوره 

وبس وبكذا نكون وصلنا لنهاية التدوينه اتمنى من قلبي تكونو استفدتو ولو بشي بسيط

 واشوفكم بمواضيع قادمه 💕