مساءكم سعاده وهناء يارب 🙊💕
كيفكم ؟ اشتقت انزل بالمدونه مره
يعني احس اسبوعين اللي مرو كان فيه شي ناقص وبرود غير طبيعي بس لاني مانزلت تدوينات ، بس لي عوده انشاءالله 👀👌🏻
الشي اللي ماتعرفونه اني قبل شهر نقلت للبيت الجديد والتهيت بترتيب غرفتي وتزبيطها وحركات وبركات 😜، وماعرفتني لما صرت اشتري ديكورات واشياء بسيطه لغرفتي عادةً خواتي وخواني يشترولي بس هالمره اشتريتها بنفسي ( تجربة جديده )😇 ، مارح احكي تفاصيل لان لي نيه انزل تدوينة دسمه اكتب فيها من اول ما نقلت عفشي بغرفتي لحد ماوصلت لشكلها النهائي 😍فكلي حماس 👏
لكن اليوم رح تكون التدوينه قطع اساسيه اشتريتها لأول سنه جامعه ، ماتتعدا ٢٠٠ ريال بس ومن زمان متحمسه اكتب هالتدوينه و طلبت هالمره طلبيه محترمه من شي أن وتوفقت فيها 💕
رح اكتب تحت كل قطعه سعرها ورابط شراء القطعه 👌🏻
تنويه : عدلو جلستكم بطريقة مريحه وجيبو شي تشربوه لأن التدوينه بتكون طويله حبتين 😗❤️
طيب نبدأ بالملابس :
القطعه هاذي اول ما شفتها بالموقع وقعت بغرامها 😍 اول ما وصلتني ما أقولكم توب التوب ، حلوه 👍 قماشتها بارده تحسون اللي قطن وستريتش ، القماشه اللي تتمطط وخفيفه ؟ هاذي هي ، المهم طلبتها لأني احتاج للجامعه شي كاجول البسها واطلع او مع جاكيت، لأن كل البلايز اللي عندي كشخه وتطريز وطباعه ماعندي تيشرتات كثير فعشان كذا بتلاحظون
اني اعتمدت على ساده والتيشرت في الطلبيه هاذي 👀 ، اخذت مقاس ميديم ، وطلع المقاس عالزبط لا كبير ولا صغير 👌🏻 ، اشتريت التيشرت ب ٢٣ ريال
رابط القطعه :
ثاني قطعه اهي بلوزه بيضا قماشتها ثقيله شوي مو شتويه مره بس مو خفيفه ، غير كذا اخذت مقاس سمول واول مره اجازف في شي ان واخذ مقاس سمول 😅 انا في اي موقع اطلب منه او محل اشتري منه اخذ مقاس سمول او ١٠ لكن شي ان لان مقاساتهم تختلف من قطعه للثانيه فأخذ ميديم وفوق ، دايماً اقول ان القطعه اذا كانت وسيعه وطويله تتزبط افضل من قصيره وضيقه واتوهق فيها ، بس في هالقطعه جازفت واخذت سمول 😫 فيني فتفوتة حسافه ☹️💔 لان قماشتها ترز الجسم وحلوه اخذت سمول وصارت مو مساك على الجسم صارت ضيقه ضيقه 😫 و تشف شوي من كثر ماهي ضيقه ، لكن هذا ما يمنع اني رح البسها ☺️ من اللحين لبعد كم شهر اعرف انه رح ينزل وزني زياده على اني مو سمنانه وجسمي حلو لكن اذا نحفت رح البسها لانها حرام حلوه ☹️💜 اول مره يصيبني هالشعور ، اللي احط قطعه بدرجي واقول اذا نحفت البسها 👀 مو متعوده ، في من هالقطعه خمس الوان ، احس اللون العنابي الاحمر حلو يمكن ارجع اطلب المره الجايه من اللون العنابي 👌🏻❤️ لان قصتها تحلي الجسم ، على العموم اشتريتها ب ٣٣ ريال
رابط القطعه :
هاذا برضو تيشيرت اسود ساده بياقه قصيره ، نفس الحكايه قماشته تحسونه القطن الستريتشي ، بس مكتوب انه من بوليستر والياف صناعيه والياف لدنه ، ماعلينا ، لازم يكون بدولاب تيشرت ساده بألوان اساسيه اسود وابيض ورمادي ، كان عندي بلوزه حفر من سترادافاريوس لونه اسود بياقه حللت ام امها 👌🏻 تلبسينها وتلبسي فوقها جاكيت وانهينا واحلى تنسيق 😛👍 سنه وحده بس وكرفتها وصارت ما تنلبس على الكرف اللي جاها فقلت اشتري نفس موديلها من شي ان نص كم تحل محل القديمه 👀 تكون استثمار بالدرج وغير كذا لو مالي خلق اكشخ البسها وانتهى الموضوع ☺️ اخذت
مقاس سمول جات على مقاسي ماسكه لكن مو مبين كثير اذا تشف او لا بسبب لونها، لكن فيها عيب ما ذكرته بالبدايه ، انها قصيره 🤭 يعني توصل للسره او تحت السره ، قصيره مره على ان عندي بلايز توب الا ان هاذي البلوزه اقصر بلوزه عندي 😓 فيا اني البس تنوره هاي ويست او البس جاكيت واسكره من تحت بحيث يغطي بطني ، هذا التعليق الوحيد بخصوص التيشيرت اشتريته ب ١٢ ريال 😍
رابط القطعه :
هذا التيشرت برضو من التيشرت اللي قولت اني رح استثمرها بدرجي لان لونها حيادي او اساسي بالدرج برضو مشكلتها انها ضيقه شوي لاني اخذت مقاس سمول وانا المفروض اخذ ميديم 😓 لكن لونها حلو خامتها حلوة وبارده وما يمنع انها رح تخدمني بعد في اكثر من تنسيق فإيه هاذي البلوزه جميله وماعندي عليها ملاحظات للأن 👀 ، برضو فيه منها الوان فيه ٨ الوان انشاءالله بطلبياتي الجايه اخذ كذا لون منها بمقاس ميديم، اخذتها ب ١٣ ريال 👏
رابط القطعه :
الشنطه قلت ابدأ فيها اول سنه جامعه بعدها ابدأ اشتري شنط اكثر بألوان تناسب التنسيقات ومنها اعرف وش البس وش ما ألبس 👀 الشنطه بالنسبه انها للجامعه حسيتها شوي صغيره 🤭 مو شوي والله كثير ، قبل اطلبها فتحت التعليقات على اساس اشوف الناس اللي طلبوها وصوروها كيف شكلها بالبس وكيف حجمها وحسيت حجمها معقول لاهي اللي مره كبيره تكسر الظهر ولا اللي صغيره ماتشيل شي 🤷🏻♀️ لكن لما وصلتني حسيتها اصغر من ماشفتها ، غريبه ! وصلتني ريحت الجلد واضحه ، ورايحه خايسه مو من حلاتها 😅 لكن احس تفي بالغرض لحد ما اشتري شنط اكثر واكبر بالمره الجايه ، اخذتها ب ٣٠ ريال
رابط القطعه :
وبعد ما خلصنا من الملابس نبدآ بأحلى فقره الشوزات 😍👌🏼
طبعاً انا اكثر شي احبه بشي ان شوزاتهم 😍 اسعارهم تجنن والكوليتي فنان وتعيش وتكد ، كان عندي شوز ابيض من شي ان اشتريته قبل سنتين و كديته كد ، وارجع انظفه بالفرشه ويرجع كأنه جديد وهذا اللي احبه فيهم ، ولاني السنه الجايه بتكون اول سنه جامعه قلت اشتري بداله شوز ثاني ابيض بشرط يكون من شي ان لاني بديت احبهم صدق من جمال شوزاتهم 💕👏 الشوز الابيض السبورت مهم يكون بالدرج لتنسيقات السبورت او الكاجول حتى مع الرسمي يلبق ينلبس معها شوز سبورت ، فشوز الابيض مو خساره ، فاخترته وطلبته من التعليقات ومن الصور اللي شفتها له ، اموت واقولكم قد ايش خفيف ومريح 😍💔 تحسين انك تدعسين على قطن صدق صدق خفيف ، وجا على مقاسي بالزبط ، المقاس اللي يجي على رجلك وتحسين رجلك تتنفس ، هذا هو الشعور اللي حسيته لما لبسته👌🏻😂 اخذت مقاس ٣٩ اكبر من مقاسي بمقاس واحد ، اشتريته ٤١ ريال
رابط القطعه :
الشوز السبورت الثاني اول ما شفته بالموقع طرى على بالي مليون تنسيق 👌🏻😍 وقلت بنفسي لو شريته رح انتفه على كثر ما البسه مع كثير ملابس بدرجي ، الألوان اللي تغلب على دولاب ملابسي الابيض الاسود والاحمر وهاذي الالون اجتمعت بشوز 🤭💜 حبيت ولما وصلني صارت عيوني قلوب 😍 مره حلو جلده قاسي وراكز ما ادري اذا بيكون مريح مع المشي بس اللي اعرفه وواضح لي انه كشخه👌🏻 وهذا المهم 😛 اشتريته ٥٩ ريال
مقاس ٣٨ مقاسي ، وطلع ماسك تكه لكن مع كثرة اللبس بياخذ على شكل الرجل فأنتو اذا بتطلبونه خذو اكبر من مقاسكم بسايز واحد عشان يكون فيه نفس اكثر وترتاحون فيه لان زي ما قلت جلد راكز 😁
رابط القطعه :
ما ادري ايش مشكلتي مع الألوان الفلات البينك ونود والبيجيات ، عندي ترليون فلات بهاللون🧐 مع ذالك اشوف واشتريه 😅 قصته تجنن مره ورزه وجلد يلمع واحب هذا النوع من الجلد ، كنوع من التغير عن الشوزات السبورت حبيت اشتري شي فلات يلبق مع القمصان والاشياء فلورال بدال السبورت كنوع من التغير ، غير كذا اتخيله مع خلخال لولو بيطلع يجنن ، اخذت مقاس ٣٧ وطلع مزبوط بالتمام على رجلي لا اصغر ولا اكبر ، اشتريته ب ٥١ ريال 💕
رابط القطعه :
اخيراً وليس اخراً اشتريت حلقان على شكل حلقات *اتوقع اني اخر وحده اشترت هالحلقان* 😂 على العموم تجي ثلاث ذهبي وفضي وروز قولد ، تجنن فيها ثقل الشوي و سميكه تحسين انك لابسه حديد بأذنك ، لكن منظرها حلو وكيوت واول مره البس حلقان بهالحجم الصراحه حجمها ميديم مو مره هيوج زي اللي يلبسونها بس بالنسبه لي اطول حلقان لبستها بحياتي 👌🏻🙊 اشتريتها ب٨ ريال
رابط القطعه :
وبكذا يكون مجموع القطع 270 ريال 💜
وبس بكاسة كوفي نروق ونختتم التدوينه 💕 انشاءالله تكونو استمعتو زي ما انا استمعت وانا اكتب التدوينه ، صارلي من اول ما طلبت هالطلبيه وانا كلي حماسه اني انزل عنها في البلوق ، وّنزلت 👏💜 فبديت كتابتها من اسبوعين يمكن او ثلاثه واليوم اختتمتها انشاءالله تكونو استفدتو بشي ولو بسيط واشوفكم بمواضيع قادمه ✨
تعليقات
إرسال تعليق