قطع اشتريتها من نمشي 🛍 هل توفقت فيها ولا لأ ؟ 🤔

مساءكم خير وحب وسعاده 💕 كيفكم ؟ 

اليوم رح تكون التدوينه عن اكثر قطع اشتريتها من نمشي وانصدمت منها او انها طلعت غير عن الصور ، الحمدالله ماصارت لي كثير مره هالشي لكن لي تجارب مع كم موقع و صارت ان اختلف شكل او لون القطعه عن الصوره 😑 

الله لا يوريكم صارلي كم يوم افكر بعنوان للتدوينة وماطلع معي شي ، يعني بالغصب طلعت العنوان بعد عناء طويل 😂👏

انا المواقع اللي جربتها الى الان هي ٤ مواقع ما جربت اطلب من غيرهم : 

نمشي ، شي ان ، فوقا كلوسيت ، وبوهو 

فوقا كلوسيت هاذا الموقع عشقي الأبدي 💘 ستايل هالموقع صدق يعبر عني 👌🏻💜 وكل اختياراتي منه موفقه والشكل نفس الصوره بالزبط ومقاساتي تكون تمام التمام 👏 ف فوقا مارح ينذكر لانه حبيب وما ارضى عليه خزانتي كلها منه 😂💕 على العموم في هالتدوينه رح اذكر موقع نمشي وافضل واسوء تجاربي في الثلاث اربع مرات طلبتها منه ورح تكون سلسله بعد هالتدوينه اذكر فيها باقي المواقع ،  لكن هالمره رح استفتح بموقع نمشي 👏

ويلا نبدأ : 

أول قطعه اشتريتها من موقع نمشي 👀

شنطه من نايكي classic North 

شريتها قبل سنتين تقريباً مره زمان لما طلبتها لما دخلت الموقع ودورت على القطعه للأسف مالقيتها ☹️ عجزت وانا افرفر بالموقع عشان اوريكم كيف طالع لونها بالموقع بس للأسف . 

اول ما شفتها بالموقع وحطيتها بالسله كانت عيوني قلوب كذا 😍 لونها في الموقع كان شي خورافي لون بيبي بينك على مشمشي شي كذا رايق ومره بنّاتي وكنت منسقه لون الشنطه على الوان شوز تناسبها 👌🏻 وانصدمت لما وصلتني كانت بهاللون 😕 لون وردي فسفوري فاقع 🙂💔 فاقع فاقع ما يمزح 😂 يعني اللون غير مليون مره عن الموقع 🤦🏻‍♀️يعني انا ما احب هاذي الألوان حتى لمن نزل موضتها ابداً ما حبيتها اني انزل بالشارع باللون الفاقع ذا مرره ملفت ويفشل 🤗  فلما وصلتني الشنطه كذا صار فيني اللي ياساتر 😲 ما اتذكر السعر كم بالزبط بس اتوقع انها ١٢٩ شي زي كذا مو مره غاليه حلو سعرها ، المهم حجمها حلو السحابات فيها كثيره وتشيل صدق تشيل 👀 عاد انا قشي بالمدرسه اكثر من كتبي علبة نظارات ونوتات و اشياء مالها داعي مخليتها بشنطتي عشان ياخيف بحتاج ومع ذلك تاخذ مساحه 🤓 فمره شالت كويسه اخذتها لما كنت بأول ثنوي ، للأسف انها من النوع اللي اذا بقع فيها شي يبان وضوح الشمس ، لان لونها مره فاتح مررره ، فيبان خطوط التراب و خطوط اقلام الحبر وغيرها وصعب تنظيفها ، ومن غسله وحده يبهت لونها ويبان انها كأنها مكدوده واهي ماصارلها كثير وخامتها حلوه لكن اللون بعد الغسيل معطي هالمنظر 😕

فهالقطعه مو مره كانت نفس ماكانت ببالي ، مع ان فيه الوان ثانيه من نفس الكوليكشن تجننن 💜 تمنيت اني شفتها قبل لا اطلب هاذي وشفت بنات في مدرستي لابسين من نفس الكوليكشن من نايكي لكن حظي 😗👎 للمعلوميه 

هاذي اول مره اشتري شنطه للمدرسه من نايكي ، كنت متعوده على بوما لان بوما صدق سنتين تقعد معي و بكل مره 

اغسلها تطلع جديده ، لحد ما وصلت لثالث سنه الشنطه صارت تحتظر على كثر ما كرفتها 😂 و قلت اغير واخذت من نايكي ، انا عندي احساس ان نايكي شنطهم احلى من كذا لكن تجربتي ماكانت موفقه 🙅🏻‍♀️ وما ادري اذا بالمستقبل رح اعطيه فرصه ثانيه او بدور بديل 🤔 

بس هالشنطه ماتوفقت فيها 👎

:ثاني طلبيه طلبتها من نمشي كانت بالسنه هاذي، برضو للمدرسه كنت ماخذتها لثالث ثنوي على اساس بشتري الشنطه وشوزات جودتها تمشي للترمين وما احتاج الترم الثاني ابدلها 👀 شي يكد وجودة فرجعت اطلب من نمشي شنطة من 

اديداس وشوزين من ماركة اسمها كوكو ، الشنطة اخترتها على اساس لابقه على لون المريول 🤓 على العموم الشنطة كلمة روعه روعه روعه قليل عليها 👌🏻💘 فعلاً كان اختياري موفق باللون وخامه حتى خامتها مو شفافه ، عكس شنطة نايكي اللي قبل شفافه شوي اذا حطيت شي يبان شكلها ، عاد اديداس مايبغاله مدح دائماً عال العال 😗💜 

هاذا شكلها بالموقع : 

سعرها ١٠٠ ريال ، شي شي شي ❤️ اكثر شنطة ظهر طلبتها وعجبتني حبيتها من قلب 😍 وفعلاً كدت معي الترمين كامله وما احتجت اغيرها لونها يساعد انه اي لون حبر يبقع فيها ما يبان ويخف مع الغسيل 👀 

يعني هذي الشنطه ترليون توفقت فعلاً 😍😍

اما الشوز اللي بالصوره اللي فيه حبات لؤلؤ شكله بالموقع : 

الشوز هذا كان صدمة عمر 🤦🏻‍♀️ ، اول ما وصلني كان شوي مبهذل طايح من قدام حبتين لولو ، وما ادري هل طاحت في فترة الشحن او خطأ من التصنيع ، لكن لما دورت على حبات اللولو في العلبه عشان ارجع اعدلها ما لقيتيها ، فتوقعت انها من التصنيع ، غير ان الايطار الحديده اللي حول اللولو مثل الدبوس مثبت لكن اللولو نفسه ملزق بصمغ وسهل يتقشع 🙎🏻‍♀️👎 شكل مره شيك وحلو وطلع نفس اللون ونفس الصوره بالزبط لكن المشكله باللولو نفسه هو الشي الوحيد اللي محلي الشوز وهو الوحيد اللي خرب شكله لما تقشع 🤗💔  

وغير كذا طلبت مقاسي ٣٨ وطلعت واسعه شوي شوي بس ، واستغربت لان الشوز الوردي اللي رح اوريكم ياه بعد شوي اخذته اكبر من مقاسي بنص ٣٨.٥ وطلع مقاسي بالظبط مع انها من نفس الماركة كوكو فهاذا الشي بعد ما توفقت فيه وما كنت عارفه اذا المفروض اخذ اكبر من مقاسي او لأ 👀 

فهاذا الشوز ماتوفقت فيه👎

اما الشوز الثاني : 

الشوز هاذا يجنن مره حلو حتى بالبس واللون طلع نفس الصوره 😍💕 والمقاس تمام  ماعليه ملاحظات ابداً حتى الترتر كان مثبت كويس حتى لما كنت انظف الشوز ما تأثر ولا طاح الترتر 

فهاذا الشوز توفقت فيه 😍👌🏻

اما الاكسسواريز لنا ثلاث طلبيات اخذنها من سوارفيسكي من نمشي ، اول مره طلبت فيها اكسسواريز سوارفيسكي كان بيوم ميلاد اختي زينب ، وكنت بأخذلها عقد كان من زمان خاطرها فيه اللي هو هذا العقد :

طبعاً العقد روز قولد مع كرستال اسود اللون طلع نفس الصور 👌🏻 ، طبعاً ماعندي صوره له في الواقع ودورت على الحجم الصغير بالموقع مالقيته برضو فهاذا صوره للحجم اللي اكبر منه لكنه نفس الشكل 👀 لكن انا غلطتي انه ما شفت حجم التعليقه في الوصف وما قستها فكنت متخيلتها بتكون اكبر شوي بس طلعت اصغر ، مارح اقول انها مو حلو حجمها بالعكس طلع حلو ولمعتها وكل شي فيها يجنن لكن بأول لحظه شفتها استغربت من الحجم لكن اخذنا عليه واهم شي انه اعجبها 💜 فا الصراحه لما شفت الحجم مقارنتاً بباقي الاحجام الاكبر حسيت ان العقد الصغير اكيت ويحلي اكثر وانشاءالله رح اطلبي قريب عقد من نفس النوع لكن بلون ثاني 👏💕

مو متذكره السعر اتوقع بحدود ٢٨٠ 

فرح اقول توفقت فيها 😍👏

اما ثاني قطعه من سوارفسكي جاتني هديه برضو من اختي بعيد ميلادي ١٦ 🙊 ، اسوره ذهبيه بيسك مره حلوه ، تجنن اتعب اقول تجنن ☹️ ، تمشي مع كثير من اكسسواراتي 💘 تحلي يد وعليها القيمه 👌🏻 نسقت معها ساعه سوداء من دانيال ولنتغتون وطلعت شي فظيع 💕 لها معنى خاص هلأسوره و قطعه من قلبي لانها جاتني من هديه من هالانسانه ❤️

مع انها هديه لكن توفقت فيها 👏

اما القطعه الثالثه من سوارفسكي كانت هاذي اسوره : 

اشتريتها لما تخرجت من ثالث ثنوي بمجموع ٩٧ فأخذتها مكافأة لنفسي 👏💕 من زمان كان خاطري فيها ولان الاسوره اللي قبل لونها ذهبي وحبيتها وزي ما قلت انها مشت مع اكثر اكسسواراتي فقلت ليش ما اخذ الفضيه ؟ 🤔 يصير انسق الفضيه مع ساعات من نفس اللون او بنفس الايطار  🤭 وفعلاً اخذتها وحبيييتها 💪 اللمعه وشكلها بالأيد مرره تجنن 😍

سعرها ٣٤٠ اخذتها بخصم الكود وصارت ٢٧١  

فهاذي الاسوره برضو توفقت فيها 👌🏻

معلومه 📌

لما رحت لفرع سوارفسكي في الظهران مول وسألتهم اذا اقدر اعدل على اساوري او عقدي واذا يشملهم ضمان لان اشريتهم من نمشي ، فقالو لأ اي اكسسور من سوارفسكي تطلبونه من الموقع مايشمله ضمان 👀 ولا يقبل بتعديل الاكسسوار بأي فرع سوارفسكي موجود ، فأذا ناويه انك تشتري قطع سوارفسكي من نمشي اشتري تجربه حلوه لكن لها عيوبها ، ليش لها عيوب ؟ اول عيوب انك ماتقدرين تختاري المقاس اللي ينسبك سواء في اسوره او اغيرها ، المقاسات تكون عشوائيه بين سمول وميديم ، عكس لما تشترينها من الفرع تختار المقاس بنفسك ، سوارفسكي ارخص في نمشي من فروعهم ، والسبب يعود لان مافي ضمان نفس ما قلتلي الموظفه بالفرع ، فا انا اخترت اني اطلب من نمشي لانه بمنطقتنا ما عندنا فروع سوارفسكي فخترت اطلبها انولاين فأذا بتطلبي حطي في بالك هالشي 👀 واللي جرب يطلب من الموقع نمشي او غيره من مواقع لهالماركة يذكر تجربته نفيد ونستفيد 💕 

وبس بكذا يكون وصلنا لنهاية التدوينة انشاءالله تكونو استفدتو ولو بشي بسيط واشوفكم في المواضيع القادمه *