أسميته " ألهامي "

يامساء الخير وجمعتكم مباركة 

حبيت اجواء تدوين مع اني فاتحه مدونتي من ٢٠١٦ والى الأن ماحسيت بشغف التدوين قد ماحسيت فيه اللحين ، احس بمساحه كبيره جداً تخصني انا وبس واتكلم فيها بكل اريحيه ، ولان تجدد عندي الحماس و الشغف في التدوين ،  لذلك فتحت قسم جديد بالمدونه ما يخص التغذيه ولا الرسم ولا المشتريات ولا تصميم لا ، هذا القسم يخص المواضيع اللي اتكلم فيها وانا بحاجة هذا الكلام اهي مواضيع صعب اقول عنها تطوير ذات او عن علم النفس جداً صعب اسميها بالاسم لاني ماني اهل اني اتكلم في ذي الأمور  ولا لي ثقافه كافيه بتطوير الذات عشان اتكلم فيه ، لكن هو كلام اكتبه واقوله لانه ساعدني بعد الله اني اتخطى ازمه او مشكله ماتوقعت اني اتخطاها وانا سليمه ، وقررات اتخذتها ماتوقعت اني بقوى واتخذها ، كلام احتاجه عشان يعطيني جرعة ايجابيه في الوقت اللي احس ان الدنيا مسكرة بوجهي ، وان كل شي ضدي ، كلام احتاجه لما احس بأحباط ، احتاج كلام يلهمني و يحسسني ويرجع يوعيني ويذكرني بأن الله معي وماني لوحدي ، يلهمني الصبر ، يلهمني القوة ، يلهمني شغف اكثر ويلهمني الأراده في أني اسوي شي لنفسي احبه واعمل فيه ، انا اعتبر كل شي في حياتي يحتاج للألهام ، بدارستي احتاجه عشان اشد حيلي في الفتره اللي احس اني مو قادره اذاكر ومحبطه من علاماتي ، احتاجه في هواية الرسم عشان اخلق لوحة وفكرة جديده ، احتاجه بتنسيق القطع الملابس والديكور عشان اطلع من القطعه الوحده عشر الالاف تنسيق ، احتاجه بطبخ بتصوير احتاج الالهام اكثر من اي شي ثاني ، الالهام في التفاصيل الصغيره تخلق لي عالم ، احب اتواجد فيه واعيشه ، وهينا جات فكرة تسمية القسم اللي خصصته في المدونه " ألهامي " بعد ايام كثيره وانا افكر بتسميه توصف الشي اللي ابغى اوصله لنفسي اذا قريتها بعد وقت طويل ، او اني اوصله لشخص يحتاج انه يسمع هذا الكلام ، من يدري ...